SAMBAH

PIDATO PASAMBAHAN SIRIAH CARANO

Gunuang nago di pauah limo
Nampak nan dari kampus Unand
Jaweklah salam dari ambo walau indak bajabaik tangan

Assalammualaikum warahmatullahi wabarakatu

Sairiang balam jo barabah
Barabah lalu balam mandi
Sairiang salam jo sambah sambah lalu salam kembali

Takalo ambo ka marambah
Di ladang urang koto marapak
Baringin patah tatipo
Takalo ambo ka manyambah
Lah tasuruah jo niniak mamak
Sarato urang nan basamo
Bukannyo ambo cadiak pandai

Bari basuji lengan baju
Cindai diambiak ka basahan
Bajaik sangkuik satiok tapi
Adaik urang kayo jo panghulu
Limbago kato basambahan
Tando alamaik putiah hati

Talatak puntiang di hulu
Di bawah kiliran taji
Asamulo rundiang dahulu
Tigo limbago nan tajadi
Patamo sambah manyambah
Kaduo siriah jo pinang
Katigo baso jo basi

Sambah manyambah dalam adaik
Tali batali undang-undang
Tasabuik bamuluik manih
Tapakai di baso baiak

Muluik manih talempong kato
Baso baiak gulo dibibia
Dalam cupak nan piawai
Adaik banamo sopan santun

Adaik di lauik bajuru mudi
Adaik di sabuang bajuaro
Adaik di alek barajo janang
Kok dikaji si juru mudi
Tau di angin nan basiru
Tau di ombak ka badabua
Jaleh bana di pasang turun naiak
Kok dikaji tantang si juaro
Tau dibulang nan bakicuah
Pandai managak manampih taruah
Tau dek tuah sisiak ayam

Kok dikaji si rajo janang
Tau didahan ka maimpok
Tau dirantiang ka mancucuak
Tau di urek ka manaruang
Tau dibayang kato sampai
Tau di ereang nan jo gedeang

Ramo-ramo tabang malayang
Malayang ka koto tangah
Banyaknyo ampek puluah ampek
Indah carano alang kapalang
Lah tibo di tangah-tangah
Tibo di lingkuang urang nan rapek

Buruang sinurak buruang sinuri
Manari-nari diateh pamatang
Siriah galak pinang manari
Mancaliak carano nan lah datang

Tanam siriah jo tabu udang
Tanam karakok dihalaman
Cabiaklah siriah gatoklah pinang
Ambiaklah rokok kapamenan tangan

Tarantang tali dibawah janjang
Elok diambiak pangabek sikek
Kok dirantang namuah panjang
Elok dipunta nak nyo singkek
Putiah kapeh dapek diliekputiah hati bakaadaansakian sambah dari ambo

Assalammualaikum warahmatulahi wabarakatu.

PAMBUKA KATO

Assalamu’alaikum warahmatullah pamulo pambuko kato
Kato partamo dijawek jo bismillah kato kaduo (bismillah)

Sairiang balam nan jo barabah, barabah lalu balam mandi
Sairiang salam nan jo sambah, sambah lalu salam kambali
Partamo sambah manyambah, nan kaduo baso jo basi na katigo siriah jo pinang langkok jo rokok nan sabatang
Nan jo carano sambah kami antakan, barisi siriah pinang sadah gambia langkok jo rokok nan sabatang.

Kok siriah sacabiak mintak dikunyah kok rokok sabatang mintak diisok nak sanang hati kami sipangka langan
Bukannyo sarak palarai sajo, sarok kok ado suaronyo sapukan taruih ka halaman
Bukannyo sambahan siriah saja, nyampang kokado ka paguno ambiak pitolong ka pidoman
Anau ketek sago nan dapek, dapek nan rapek, rapek mamintak diduduakkan, duduakkan bana masuak banak.

Kami kok ketek bapandapek, kok salah tolong tunjuakkan baa nan batuah.

Kok duduak yolah tabantang lapiak, nio baganti jo tampek duduak, parintang rintang hari nan sadang sanjorayo untuak parintang hati nan sadang rusuah kami tuahkan saji tarian sarato nyanyian dari kami.

Urang padang marantang banang digumpa dilipek ampek lalu dipatigo, kok dirantang namuah nyo panjang elokdigumpa naknyo singkek ambiak sekedar ka paguno.
Wassalamu’alaikum warahmatullah wabarakatuh.